صورة من ميدان التحرير

في ناس كتير -للاسف- لحد النهرده مرحتش التحرير, إزاي التحرير فيه كل طوائف المصريين!!, إزاي المسيحي والمسلم, الليبرالي والشيوعي, السلفي والاخواني كل دول في مكان واحد

أنا هحاول ارسملك صورة من التحرير عشان تصدق إنك ليك مكان هناك مهما كان توجهك السياسي أو حتى لو مالكش أي توجه زي معظم الموجودين هناك

هانتنزل من المترو محطة الأوبرا وتتمشى على كوبري قصر النيل, العربيات حواليك والناس في كل مكان مئات مروحين من الميدان والاف بدلهم داخلين,خلصت الكوبري هتلاقي صف دبابات واقف جنب مكتبة الجامعة الأمريكية وناس مدنيين عاملين صف بعرض الشارع

,بابتسامة, واحد منهم هيطلب منك البطاقة هتلاقيه مهتم إنه يشوف الوظيفة - تقريبا مش بيدخل حد تبع الأمن - وهيفتشك,

طبعا في بنات موجودين في اللجنة ده عشان يفتشوا البنات

خلصت تفتيش هتبدأ مظاهر الإحتفالات صفين طوال نسبيا بتاع 25 متر بيصفقو ليك ويغنوا لك

أهم أهم أهم, المصريين أهم

كله بيضحكلك في الغالب هتكون أول مرة تحس فيها إنك مهم قوي كده, كل الناس ده فرحانة بيك, طبل وأغاني وزمامير عشانك إنت بس

على اديك الشمال مسجد عمر مكرم مليان على اخره اللي بيصلي واللي نايم واللي عايز يروح الحمام, كمل مشي

الميدان على بعد 70 متر أهو, هتلاقي الحتة ديه الصحفيين والمراسلين بالكاميرات بيتكلموا مع الناس لو ليك فالجو ده برشت على أي قناه

طيب أروح فين من هنا بقى

بص يا سيدي التقسيمات من هنا كتير

بإختصار فيه 6 تقسيمات

القسم الديني

القسم الترفيهي

القسم السياسي

قسم اللوحات

قسم الخيم

القسم الطبي

القسم الثورجي

القسم الديني

وده في الغالب موجود عند تمثال عمر مكرم وشوية عند المجمع هتلاقي ازهريين كتير بالعمة والقفطان وملتحين بيدعوا أو بيقولوا خطب سياسية بمرجعية دينية, أذكار الصباح والمساء, يعني أنت فاهم الجو ده

القسم الترفيهي

وده قسمي المفضل وده موجود مابين المجمع و الميدان, بتاع 200 سماعة فوق بعض و واحد ماسك عود أو فريق ماسكين جيتارت أو طبول وبيغنوا, بص جامدين موت أنا فاكر شوية لسة من كلمات الاغاني

يا مصر يا أجمل دولة في الكون, العاقل فيكي يشوف نفسه مجنون

وفاكر برضه

قالوا مجنون اللي يفكر الدنيا فيها أكتر ويقول إزاي ومنين

قالوا مجنون اللي يخلي مبارك كابس تملي من سنة واحد وتمانين

طبعا مش دايما بيبقى فيه ناس بتغني ساعات برضه تلاقي في المكان ده خطب سياسية

القسم السياسي

وده مركزه عند هارديز وبيملك اكبر عدد من السماعات المنتشرة في كل مكان

وده برده المكان اللي بنصلي عنده وفالغالب بيكون فيه قنوت في الصلاه

هتلاقي بقى هنا كل الناس بيقولوا خطب وشعارات سياسية

عبد الحليم قنديل

العوا

نادر السيد

ناس مجهولة

لو عايز تحس بجو المظاهرات فـده مكانك بالتأكيد

قسم اللوحات

وده موجود في كل مكان, الشعب المصري اثبت موهبة مدفونة في الموضوع ده

ده شوية من اللي فاكره

مبارك, طير أنت

يا مبارك يا طيار جبت منين 70 مليار

ارحل بقى ابوس التيت

بص جامدين جدا, الاف من الناس معاها شعارات جامدة السنين

قسم الخيم

كل يوم حجمهم بيزيد موجودين في كل الجناين, الميدان و تمثال عمر مكرم في جوانب الشوارع

هتلاقي جواه ناس نايمة أو مستلقية أو ناس بتاكل

كل المستويات موجودة الفلاح نايم جنب المحامي جنب المهندس جنب أطفال

ساعات بتبقى شباب نفس المحافظة مع بعض, تلاقي كتبلك على الخيمة تجمع أبناء سوهاج

بص ظراف عدي على أي حد منهم هتلاقيهم بيكلموك وعايزينك تاكل معاهم أو يواسعولك حتة تنام فيها

القسم الطبي

وده برضه منتشر في حتت كتير, الخيمة الكبيرة في قلب ميدان التحرير و فيه خيم ناحية عبد المنعم رياض عشان ده مكان هجوم البلطجية. مئات من الداكترة منتشرين في كل حتة من جميع التخصصات

الظريف بقى إن الدكاترة ده ظهروا أصلا عشان يسعفوا المصابين في يوم الأربع الاسود, بس هتلاقي ناس جيالهم من البيت مخصوص عشان يكشفوا ببلاش. كل الدكاترة اللي هناك بيكشفو على أي حد ببلاش سواء كانت اصابة المعارك أو واحد عايز يكشف عادي. مفيش بقى استغلال الدكاترة اللي معروف. كل الناس ظريفة اكننا شعب تاني

القسم الثورجي

وده القسم الاكثر خطورة وده من عند عبد المنعم رياض لحد مدخل المتحف المصري, شباب معظمهم اصيب في الإشتباكات اللي فاتت -معظمها اصابات في الرأس- ومصممين يدافعوا عن الميدان

للأسف هتلاقيهم مبهدلين قوي اللي لبسه مقطع واللي الطينة لازقة في وشه هاتفتكرهم في الأول متسولين أو ناس غلبانة والمفاجأة إن معظمهم دكاترة أو اساتذة في الجامعة أو مهندسين حالفين مش هيسيبوا المكان ده إلا لما مبارك يمشي وانهم حيدافعوا عن الميدان بحياتهم. اللي رجلوا اتكسرت وبرده مش عايز يسيب مكانه

فيه جزء منهم بينام جوه الجنازير بتاعت المدرعات عشان المدرعات متسبش المكان وبيبدلوا

عاملين هناك زي متحف صغير للشهداء, فيه صور الشهداء ولبسهم اللي لسة فيه دم

الناس ده عندهم عزيمة مشفتهاش قبل كده, ربنا يكرمهم ويديهم ثواب المرابطين

يا ترى بقى إنت مكانك فين هناك؟

طبعا وأنت ماشي هتحس إن كل المشاعر اللي في الدنيا جواك

الفخر, الخوف , الحب, الضحك, القهر, العزة, والكبرياء

مش عارف فعلا اوصفلك هتحس بإيه بس عمرك م هتلاقي الإحساس ده في مكان تاني

صفين طوال حتقبلهم وإنت مروح بردو بيغنولك ويقولوا

معادنا بكرة وبعد بكرة

إن شاء الله احنا نفسنا أطول ومش هنسيب الميدان لحد لما الظالمين يسيبوا البلد

شكرا لوقتك لو عايز تقابلني أنا موجود في التحرير كل يوم