الدولة المدنية والشريعة الاسلامية

الدستور المصري مادة (2)

الإسلام دين الدولة، واللغة العربية لغتها الرسمية، ومبادئ الشريعة الإسلامية المصدر الرئيسى للتشريع

ناس كتير بتتكلم عن المادة الثانية في الدستور نشيلها ولا نخليها , طيب هل وجودها كان مفعل اصلا ولا كانت مادة شكلية موجودة عشان تفرح الناس, وبفرض استمرار المادة دي في الدستور هل سيتم تفعيلها ولا لأ

ناس كتير بتقول “لا دين في السياسة ولا سياسة في الدين" ناس تانية بتقول “الدين هو المبدأ الثابت , بينما السياسة هي لعبة المتغيرات" وبالتالي الدين لازم يكون موجود جوه المسجد بس وبره المسجد كل واحد حر.

طيب تعالوا نشوف ربنا بيقول إيه

يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ ﴿البقرة: ١٨٣﴾

كُتِبَ عَلَيْكُمُ الْقِتَالُ وَهُوَ كُرْهٌ لَّكُمْ ﴿البقرة: ٢١٦﴾

يَا أَيُّهَا الَّذِينَ آمَنُوا كُتِبَ عَلَيْكُمُ الْقِصَاصُ فِي الْقَتْلَى ﴿البقرة: ١٧٨﴾

ربنا استخدم نفس الأمر الإلهي "كُتِبَ" عشان يأمرنا بالصيام وهو موضوع تعبدي والجهاد وهو موضوع ليه علاقة بالسياسة الخارجية والقصاص وده موضوع ليه علاقة بالأحكام الجنائية. محدش يقنعني بقى إني المفروض إني أخد الصيام بس عشان ده أمر تعبدي وأسيب الجهاد والقصاص واقول أصل “لا دين في السياسة ولا سياسة في الدين" الإسلام دين شامل موجود معايا في المسجد والبيت والشغل وحتى وانا نايم. شوف ربنا قال إيه في الناس اللي كانت بتاخد بعض كلامه وتترك البعض الأخر

أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ فَمَا جَزَاءُ مَن يَفْعَلُ ذَٰلِكَ مِنكُمْ إِلَّا خِزْيٌ فِي الْحَيَاةِ الدُّنْيَا وَيَوْمَ الْقِيَامَةِ يُرَدُّونَ إِلَىٰ أَشَدِّ الْعَذَابِ وَمَا اللَّهُ بِغَافِلٍ عَمَّا تَعْمَلُونَ ﴿البقرة: ٨٥﴾

شوف برضه ربنا بيقول إيه في جزاء من لا يحتكم لشريعته

وَمَن لَّمْ يَحْكُم بِمَا أَنزَلَ اللَّهُ فَأُولَٰئِكَ هُمُ الْكَافِرُونَ ﴿المائدة: ٤٤﴾

وَمَن لَّمْ يَحْكُم بِمَا أَنزَلَ اللَّهُ فَأُولَٰئِكَ هُمُ الظَّالِمُونَ ﴿المائدة: ٤٥﴾

وَمَن لَّمْ يَحْكُم بِمَا أَنزَلَ اللَّهُ فَأُولَٰئِكَ هُمُ الْفَاسِقُونَ ﴿المائدة: ٤٧﴾

يبقى الناس اللي بتقول نخلي الدين جوه المسجد وكل واحد حر برة المسجد أكيد في قصور في رؤيتهم. مشكلة الناس ده الأساسية هي انهم شايفين إن تطبيق الشريعة هيضيق في حرياتهم ممكن واحد فيهم يكون بيحب يروح كباريهات أو يشرب خمور أو واحدة بتحب تلبس لبس قصير ولو طبقنا الشريعة هيكون في تضيق عليهم -كلام منطقي طبعا من وجهة نظرهم-

طيب الحل إيه؟

أنا محتاج إني أنفذ كلام ربنا وفي نفس الوقت مش عايز أعمل فتنة أو حرب اهلية جوه البلد. أكيد كل الناس اللي مش مقتنعة برأي مش هيعجبهم الكلام ده وهيحربوني عشان ميتنفزش

يبقى عشان ربنا يوفقنا إن احنا نعمل الصح محتاجين نعمل مجموعة من الخطوات اللي ممكن تساعد -مستقبلا –أن تسود كلمة الله

1- إن كل واحد يبدأ بنفسه, اتقن عملك, راعي ربنا, ربي ولادك تربية صح, اتعلم دينك

إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنفُسِهِمْ ﴿الرعد: ١١﴾

2- حرية الإعلام, زي ما الفنانة الراقصة دينا والمدرب المثقف حسام حسن بيطلعوا في التلفزيون والراديو والجرائد أشوف برضه يوسف القرضاوي وعمرو خالد وغيرهم بيطلعوا برضه ويكون ليهم على الأقل نفس المساحات والاوقات المخصصة لكل الناس التانية

والناس تسمع اللي هي عايزاه. أنا مقتنع إن الإسلام هو دين الفطرة ولو الدعوة كانت بشكل صح ناس كتير هتختار تمشي في الطريق الصح. ربنا بيتكلم عن الرسول في سورة الأعراف وبيقول

يَأْمُرُهُم بِالْمَعْرُوفِ وَيَنْهَاهُمْ عَنِ الْمُنكَرِ وَيُحِلُّ لَهُمُ الطَّيِّبَاتِ وَيُحَرِّمُ عَلَيْهِمُ الْخَبَائِثَ ﴿الأعراف: ١٥٧﴾

من الأخرالاسلام هو الفطرة وكل واحد عايز يكون إنسان كويس مش هيلاقي أحسن من الدين يوجهه

3- نحاول المرحلة الجاية اننا نختار أي حزب بيحترم مرجعيتنا الدينية, على حد علمي مفيش احزاب ليها مرجعية دينية غير حزب الوسط الجديد بس أنا شخصيا لسة محتاج افهم هم بيفكروا إزاي بالضبط. الإخوان أنا بختلف معاهم تماما في تواجهاتم السياسية ومعلوماتي إن حزبهم الجديد العدالة والحرية كلمة اسلام مش هتكون موجودة فيه!!!. طبعا الكلام ده ينطبق برضه على رئيس الجمهورية.

4- لازم تكون ايجابي اقنع كل الناس اللي حواليك بفكرك, لما تركب مكروباص أو تاكسي اتكلم معاه, اتكلم مع الناس المثقفة واتعلم منهم, أكتب –زي ما أنا عملت كده- المهم إنك تعمل حاجة

لو فيه ناس قليلة هي اللي الناهرده فاهمة الكلام ده إن شاء الله يكون معظم الشعب المصري فاهمه في سنة, اتنين, عشرة مش فارق المهم إنك تعمل اللي عليك

ملحوظة: أنا لا فقيه دستوري ولا فقيه ديني ولا بفهم في القانون ولا حتى بفهم في السياسة. أنا بس عايز أكون إنسان ايجابي